Истанбул руу тусгай үүргийн онгоц өнөөдөр хөөрнө
5 сарын 13, 2020

Туркийн Истанбул хотоос 170 орчим иргэнээ авчрахаар “МИАТ” компанийн тусгай үүргийн онгоц өнөөдөр /2020.05.13/ 09.30 цагт "Буянт-Ухаа" олон улсын нисэх буудлаас хөөрлөө. Онгоц энэ сарын 14-нд буюу маргааш Улаанбаатар хотод газардана. Уг нислэгээр Европт ажиллаж, амьдарч байсан монгол иргэд голлон ирнэ.

Өмнө нь гуравдугаар сарын 18-ны өдөр "МИАТ" компанийн тусгай үүргийн онгоц Истанбул-Улаанбаатар чиглэлд нислэг үйлдэж нийт 252 иргэн эх орондоо ирсэн юм. Энэ удаад 170 орчим монгол иргэнээ татан авахаар болсон.

Харин дараагийн нислэгийг ОХУ-ын Улаан-Үд хот руу үйлдэж 05 дугаар сарын 14-нд 202 иргэнийг, 15-нд Эрхүү хотоос 200 орчим иргэнийг татан авах юм. Мөн 05 дугаар сарын 18-нд Энэтхэг улс руу тусгай үүргийг онгоц нислэг үйлдэнэ.

Өнөөдрийн байдлаар дэлхийн 46 улсаас 10,836 иргэн эх орондоо ирэх хүсэлт гаргаад байгаа аж.


Сэтгэгдэл үлдээх
АНХААРУУЛГА: Уншигчдын бичсэн сэтгэгдэлд Eren.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.