Аврагчдын тэмцээнд гал түймэр унтраах, аврах 29 дүгээр ангийн алба хаагчид тэргүүллээ
11 сарын 22, 2021

Нийслэлийн Онцгой байдлын газраас дүүргүүдийн Онцгой байдлын хэлтсийн Гал түймэр унтраах, аврах ангийн алба хаагчдын хүрээнд сорил, сургалт дадлагыг өнгөрсөн амралтын өдрүүдэд зохион байгууллаа.

Сорил, сургалт дадлагад нийслэлийн хүрээний Гал түймэр унтраах, аврах ангиуд болон Дотоод хэргийн Их сургуулийн Онцгой байдлын сургуулийн багш, дамжааны сонсогчдын 19 багийн 100 орчим алба хаагч хурд хүч, авхаалж самбаагаа сорин өрсөлдөж, аваргуудаа шалгаруулсан юм. Нэгдсэн дүнгээр нэгдүгээр байрт Сонгинохайрхан дүүргийн Онцгой байдлын Гал түймэр унтраах, аврах 29 дүгээр анги, хоёрдугаар байрт Хан-Уул дүүргийн Онцгой байдлын хэлтсийн Гал түймэр унтраах, аврах 65 дугаар анги, гуравдугаар байрт Дотоод хэргийн их сургуулийн Онцгой байдлын сургуулийн баг тамирчид тодорлоо. 

Алба хаагчдын сургалтын онол, дадлага, ур чадварын чиг хандлагад үнэлгээ хийх, багийн нэгдсэн ажиллагаанд сургаж дадлагажуулах, мэргэжлийн ур чадвар, авхаалж самбаа бие бялдрыг хөгжүүлэх, тэсвэр хатуужил олгох, Гал түймэр унтраах, аврах ангиудын сургалтын үйл ажиллагааг эрчимжүүлэх, хамтын ажиллагааг хөгжүүлэх зорилгоор Монгол Улсад Гал түймэртэй тэмцэх байгууллага үүсэж хөгжсөний 100 жилийн ойг угтаж зохион байгуулагдсанаараа онцлог юм гэж нийслэлийн Онцгой байдлын газраас мэдээллээ.


Сэтгэгдэл үлдээх
АНХААРУУЛГА: Уншигчдын бичсэн сэтгэгдэлд Eren.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.