Сэлэнгэ аймгийн нутаг дэвсгэрт хээрийн түймэр гарч, 9 га талбай шатжээ
3 сарын 17, 2020

Сэлэнгэ аймгийн нутаг дэвсгэрт өчигдөр хээрийн түймэр гарчээ.

Тодруулбал, Өчигдөр буюу гуравдугаар сарын 16-ны өдрийн 12:35 цагт Сэлэнгэ аймгийн Сайхан сумын төвөөс баруун хойд зүгт 50 километрт Номгон багийн “Ширээ нуруу” гэдэг газар хээрийн түймэр гарсан тухай дуудлагыг Онцгой байдлын газар хүлээн авжээ.

Дуудлагын дагуу тус аймгийн Онцгой байдлын газрын Сайхан сум дахь Гал түймэр унтраах, аврах 61 дүгээр ангийн алба хаагчид болон холбогдох албаны хүмүүс очиж ажиллаж, мөн өдрийн 14:30 цагт түймрийг бүрэн унтраажээ.

Түймэрт есөн га талбай шатсан бөгөөд байгаль хамгаалагч Н.Санжаажамцад нөхцөл байдлыг тайлбарлан бүрэн унтраасан талбайг хүлээлгэн өгсөн тухай Онцгой байдлын ерөнхий газраас мэдээллээ.

Иймд хаврын хуурайшилттай үед:

  • Цогтой үнс нурмаа битүү тагтай саванд хийх;
  • Тамхи, чүдэнзний галыг ил задгай хаяхгүй байх;
  • Дууссан гал асаагуур зэргээ хээр хөдөө ил задгай хаяхгүй байх
  • Ой, хээрт явахдаа оч баригчгүй машин техникээр зорчихгүй байх;
  • Гэр сууц, хашаа хорооны гадуур түймрээс хамгаалах зурвас татах;
  • Шаардлагатай багаж хэрэгслийг бэлдэх зэргээр өөрийгөө болон бусдын амь нас, эрүүл мэнд, эд хөрөнгийг ой, хээрийн түймэрт өртөхөөс хамгаалах, урьдчилан сэргийлэхийг анхааруулж байна.

Сэтгэгдэл үлдээх
АНХААРУУЛГА: Уншигчдын бичсэн сэтгэгдэлд Eren.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.