ЭМЯ: ЭРҮҮЛ МЭНДИЙН САЛБАРТ АШИГЛАГДАЖ БУЙ МЭДЭЭЛЛИЙГ  АЛДАГДУУЛСАН, НУУЦЫГ ЗАДРУУЛСАН ЗҮЙЛ БАЙХГҮЙ
12 сарын 19, 2018

Эрүүл мэндийн яамнаас гурван сая иргэний өвчний түүх, эрүүл мэндийн мэдээлэл алдагдаж буй тухай мэдээлэл зарим хэвлэл мэдээллийн хэрэгслээр цацагдсан. Уг мэдээлэлд 2012 оноос хойш Хятадын талын хөрөнгө оруулалттайгаар хийгдэж буй эрүүл мэндийн салбарыг цахим болгох шинэчлэлийн ажлын алдаа дутагдал, засч залруулах ёстой зүйлсийн талаар дурджээ.

Мөн уг төслийн дагуу улсын хэмжээнд нийт 48 эмнэлгийн иргэдэд үзлэг үйлчилгээ үзүүлсэн бүх мэдээ мэдээллийг хэдхэн минутын дотор гаднаас нь сүлжээнд халдаж хүссэн иргэдийнхээ мэдээ мэдээллийг регистрийн дугаар, нэрээр нь гарган ирж харж болохыг мэдээлсэн байна. “Тус программ, дата бааз нь хамгийн өндөр нууцлалтай байх ёстой ч нөүтбүүк ашиглаад жирийн нэг програмист ямар ч хараа хяналтгүй байдлаар ханддаг гэдгийг илчилж байгаа юм” гэжээ.

Энэхүү мэдээлэлд ЭМЯ-ны Эрүүл мэндийн цахим мэдээллийн хэлтсийн дарга Т.Батбилэг  “Иргэдийн эрүүл мэндийн мэдээллийн сан алдагдахгүй, хэн ч халдаж чадахгүй. Ямар нэгэн байдлаар мэдээлэл алдагдсан зүйл байхгүй. Засгийн газар энэ асуудалд онцгой анхаарч байна.” гэсэн байна.  

Мөн “Эрүүл мэндийн мэдээлэл алдагдаж байна” гэсэн мэдээлэлд Эрүүл мэндийн яамны зүгээс албан ёсны байр сууриа илэрхийлж, мэдэгдэл гаргажээ. Тус мэдэгдэлд, “ЭМЯ 2012 оноос хойш эрүүл мэндийн салбарт мэдээлэл технологийн дэвшлийг нэвтрүүлэх, цахимжуулах үйл ажиллагааг салбарын хэмжээнд эхлүүлэн ажиллаж байна. Уг гарсан мэдээлэл нь БНХАУ улсын Засгийн газрын хөнгөлөлттэй зээлээр хэрэгжиж буй Цахим эрүүл мэнд төсөлтэй холбоотойгоор бичигдсэн байна. Уг “Цахим эрүүл мэнд” төсөл нь Техник хангамж болон програм хангамж гэсэн хоёр хэсгээс бүрддэг. Техникийн хангамжийн хэсэг хэрэгжиж дууссан бөгөөд эрүүл мэндийн байгууллагууд үйл ажиллагаандаа ашиглаж байна. Програм хангамжийн хөгжүүлэлт, нэвтрүүлэтийн ажил одоо үргэлжлээд, дуусах шатандаа явж байна.

Монгол улсын засгийн газар хүн амын эрүүл мэнд, хувь хүний эрүүл мэндийн нууц, эрүүл мэндийн мэдээллийн нууцлалын асуудлыг онцгой анхаарч, эрүүл мэндийн яамны бүтцэд Цахим эрүүл мэндийн хэлтсийг 2018 оноос бий болгон ажилласан. Эрүүл мэндийн салбарт хэрэгжиж байгаа болон, цаашид хэрэгжих системүүдийг үе шаттайгаар нэгдсэн системд холбох мэдээллийн аюулгүй байдлыг хангах, нэгдсэн тогтолцоонд шилжүүлэх ажлыг энэ онд эхлүүлээд байна. Эрүүл мэндийн салбарт ашиглагдаж буй мэдээллийг алдагдуулсан, нууцыг задруулсан зүйл байхгүй болно” гэжээ.

Түүнчлэн худал, ташаа мэдээлэл гаргасан сайт, хэвлэл мэдээллийн хэрэгслийг зөрчлийн хуулийн дагуу шүүхэд гомдол гаргахаа илэрхийлсэн байна.


Сэтгэгдэл үлдээх
АНХААРУУЛГА: Уншигчдын бичсэн сэтгэгдэлд Eren.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.