Өвс, тэжээлийг хөнгөлөлттэй үнээр малчдад олгох тухай хүсэлтийг тавьжээ
3 сарын 15, 2020

Завхан аймгийн нийт сумдад 02, 03 дугаар саруудад их хэмжээний цас орсны улмаас тал газраа 40-60 см, уулархаг газраа 60-80 см, гуу жалгандаа 1-2 м цастай болж үелсэн мөсөн бүрхүүл тогтож, хаваржилт хүндрэх төлөвтэй байна.

Баянтэс, Тосонцэнгэл, Их-Уул, Тэс, Асгат, Баянхайрхан, Нөмрөг, Тэлмэн, Түдэвтэй, Цагаанхайрхан, Яруу, Идэр, Улиастай. Алдархаан, Цагаанчулуут зэрэг сум цагаан зудтай, 4 сум цагаанаар зудархуу ангилалд багтан 24 сумын хэмжээнд 18 мянган толгой мал хорогдоод байгаа юм.

Аймгийн Онцгой комисс, аймгийн Засаг даргын зүгээс улсын чанартай зам даваануудыг нээх, Тэс, Баянтэс, Тосонцэнгэл, Их-Уул, Асгат, Баянхайрхан, Нөмрөг сумдад зам, даваа онгойлгоход шаардлагатай хүн хүч, машин механизмыг дайчлан далпуу татаж, зам онгойлгох ажлыг зохион байгуулж байна.

Монгол Улсын Шадар сайд, Улсын Онцгой комиссын дарга Ө.Энхтүвшингээр ахлуулсан Улсын Онцгой комиссын шуурхай бүлэг өнгөрсөн 02 дугаар сарын 13-17-ны өдрүүдэд баруун аймгуудад ажиллах үеэр тус аймагт 803 тонн өвсийг үнэгүйгээр, 905 тонн тэжээлийг 50 хувийн хөнгөлөлттэй үнээр олгохоор шийдвэрлэсэн билээ.

Завхан аймгийн Засаг даргын саналаар тус шийдвэрийг албажуулахаас өмнө буюу сар шинийн баяраас өмнө малчны хотонд хүргэхийг зөвшөөрсөн болно.

Иймд Завхан аймгийн Онцгой комиссоос улсын нөөцөөс олгосон дээрх өвс, тэжээлийг сар шинийн баярын өмнө өвөлжилт хүндэрсэн сумдадаа хуваарилж, малчдын хотонд хүргэх ажлыг зохион байгуулсан байна.

Монгол Улсын Шадар сайдын дээрх шийдвэрийг 2020 оны гуравдугаар сарын 11-ний өдрийн хурлаар албажуулж, бусад аймгуудын хамтаар 8.3 мянган тонн өвс, тэжээл хуваарилахаар шийдвэрлэсэн болно.

Иймд зарим хэвлэл мэдээллийн хэрэгслүүдээр мэдээлж буй Улсын Онцгой комиссоос зудтай аймаг, сумдад дахин 8.3 мянган тонн өвс, тэжээл хуваарилсан гэх мэдээлэл ташаа болохыг албан ёсоор мэдэгдэж байна.

Улсын нөөцөөс дахин 579 тонн өвс, 450 тонн тэжээлийг хөнгөлөлттэй үнээр малчдад олгох тухай хүсэлтийг Завхан аймгийн Засаг даргын 2020 оны 3-р сарын 01-ний өдөр Улсын Онцгой комисст тавиад байгаа болно.


Сэтгэгдэл үлдээх
АНХААРУУЛГА: Уншигчдын бичсэн сэтгэгдэлд Eren.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.