Зам тээврийн ослоор хүний амь насыг хохироож, хэргийн газрыг орхин зугтжээ

Зам тээврийн осол гарган хүний амь насыг хохироож, хэргийн газрыг зориуд орхиж зугтаасан хэргийг шуурхай илрүүлжээ. Энэ оны 04 дүгээр сарын 20-ны өдрийн 16:31 цагийн үед Төв аймгийн Зуунмод сумын нутаг дэвсгэрт “Гүүрний хажууд хүн нас барсан байна” гэх дуудлага, мэдээлэл бүртгэгдсэн байна. Мэдээллийн дагуу Төв аймаг дахь цагдаагийн газраас хэргийн газрын үзлэгийг явуулахад 04 дүгээр сарын 19-20-нд шилжих шөнө тус аймагт оршин суух хаягтай 79 настай, эрэгтэй “С”-ийг тээврийн хэрэгслээр мөргөж амь насыг нь хохироож, хэргийн газрыг зориуд орхиж зугтаасан нөхцөл байдал тогтоогдсон байна. Тус цагдаагийн газраас эрэн сурвалжлах ажиллагааг шуурхай зохион байгуулж ажиллахад дээрх хэргийг үйлдсэн байж болзошгүй 19 настай, эрэгтэй “Д” гэгчийг тогтоон мөрдөн шалгах ажиллагааг явуулж байгаа аж. Иймд тээврийн хэрэгслээ бусдад шилжүүлэхгүй байх, орон нутгийн замын хөдөлгөөнд оролцохдоо хурд хэтрүүлэхгүй байхыг сэрэмжлүүлж байна.