Америкийн 200 цэргийн шарилыг Хойд Солонгосоос хүлээж авснаа Трамп мэдэгдлээ
6 сарын 21, 2018

1950-1953 онд үргэлжилсэн Солонгосын дайнд амиа алдсан 200 цэргийн шарилыг хүлээж авснаа АНУ-ын ерөнхийлөгч Дональд Трамп саяхан мэдэгджээ.

Өнгөрсөн долоо хоногт АНУ-Хойд Солонгосын төрийн тэргүүнүүд Сингапурт анх удаа уулзахдаа энэ талаар тохиролцсон юм. Минессотад намынхаа сонгуулийн арга хэмжээн дээр үг хэлэхдээ Трамп “Манай амь үрэгдсэн баатруудын шарилаас 200-г нь хүлээж аваад байгаа” гэжээ.

Тэрээр Хойд Солонгосын удирдагч Ким Жон Унтай сайн харилцаатай болсноо яриад “Тэд дахин Японыг давуулж пуужин харвахгүй. Тэд бүх цөмийн туршилтаа зогсоосон. Цөмийн судалгаа, пуужингийн үйлдвэрлэлээ ч зогсоосон. Ер нь бидний хүссэн бүхнийг тэд биелүүлсэн” гэж хэлсэн байна.

Трамп дэмжигчдэдээ хандаж “Яг одоо та бүхэн айх аюулгүй. Бүх Ази даяар бидний ололт амжилтыг тэмдэглэж байна. Та нар намайг сонгосон учраас л энэ бүхэн биелсэн” хэмээн хэлж, Хойд Солонгосыг цөмийн зэвсгээс ангижруулах үйл явцыг эхлүүлсэн гавьяаг өөртөө тохжээ.

Гэхдээ 200 цэргийн шарил АНУ-д хүргэгдэж ирсэн байгаа, эсвэл замдаа яваа эсэх нь одоогоор тодорхойгүй байна.

Эх сурвалж:  Yonhap News

Сэтгэгдэл үлдээх
АНХААРУУЛГА: Уншигчдын бичсэн сэтгэгдэлд Eren.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.