USD
Мод тарих үндэсний өдөр зарлах тухай Монгол Улсын Ерөнхийлөгчийн 2010 оны дөрөвдүгээр сарын 14-ний өдрийн зарлигийн дагуу жил бүрийн 5, 10 дугаар сарын хоёр дахь долоо хоногийн “Бямба” гарагийг бүх нийтээр мод тарих үндэсний өдөр болгон зарласан байдаг юм.
Зарлигт заасан эдгээр өдрүүдэд иргэн, аж ахуйн нэгжүүд олноор мод тарьдаг бөгөөд 2010 оноос хойш 1 сая 270 мянга гаруй иргэн 68.9 мянган аж ахуйн нэгж, байгууллагууд жил бүрийн 5, 10 дугаар сарын хоёр дахь долоо хоногийн “Бямба” гарагт бүх нийтээр мод тарьсан байна.
Харин өнөөдөр Монгол Улсын Ерөнхийлөгчийн Тамгын газрын дарга З.Энхболд болон Монгол Улсын Ерөнхийлөгчийн Тамгын газрынхан Үндэсний соёл амралтын хүрээлэнд албан ёсоор нээлтээ хийсэн “Хүн бүхэнд цэвэр агаар, Мод бүхэнд ус” уриатай хаврын мод тарилтын нээлтийн үйл ажиллагаанд оролцож, мод тарилаа.
Энэ жилийн хаврын мод тарилтаар хайлаас, чацаргана, монос, голт бор, улиас, гацуур, нарс, шар хуайс гэсэн найман төрлийн 5000 орчим мод тарьсан юм. 2009 оноос хойш Үндэсний цэцэрлэгт хүрээлэнгийн талбайд нийт 27 төрлийн 123 мянга гаруй мод сөөг тарьсан бөгөөд 2017 онд тооллого явуулж мод ургалтын байдлыг тодорхойлоход 98.8 хувьтай гэсэн үзүүлэлт гарчээ. Харин улсын хэмжээнд ургалтын хувь нь 75 хувьтай байгаа юм.
