Толгойт, Тахилт бүсийн иргэд чөлөөт цагаа өнгөрүүлэх “Цагдаа толгой” цэцэрлэгт хүрээлэнгийн бүтээн байгуулалтын ажил дууслаа

Сонгинохайрхан дүүрэгт хийсэн томоохон ажлын нэг бол “Цагдаа толгой” цэцэрлэгт хүрээлэн юм. Тахилт буюу ЗЗ дугаар хорооны 122 дугаар сургуулийн дэргэдэх уг цэцэрлэгт хүрээлэн ашиглалтад ороход бэлэн боллоо. Энэхүү дөрвөн га талбай бүхий бүтээн байгуулалтын ажил 2019 онд эхэлсэн бөгөөд гүйцэтгэгч байгууллагаар “Неон гэгээ” ХХК ажилласан байна.

Тохижилтын ажлын хүрээнд 750 метр дугуйн болон гүйлтийн зам, 8,000 ам метр явган хүний зам, 54 машины авто зогсоол, хүүхдийн тоглоом, хөл бөмбөг, сагсан бөмбөгийн талбай, худаг болон ногоон байгууламжийн усалгааны систем, гэрэлтүүлгийг шийджээ. Мөн ногоон байгууламжийн ажилд 1,500 орчим улиас, хайлаас тарьж, 22.000 ам метр талбайн зүлэгжүүлэлт хийсэн байна. Тус цэцэрлэгт хүрээлэн ашиглалтад орсноор Толгойт, Тахилт бүсийн иргэд чөлөөт цагаа зөв боловсон өнгөрүүлэх иж бүрэн цогцолбортой болж байна.