USD
Хан-Уул дүүргийн Засаг даргын 2021-2024 оны “Эрүүл-Эко дүүрэг” үйл ажиллагааны хөтөлбөрийг хэрэгжүүлэх ажлын хүрээнд Өрхийн эрүүл мэндийн төвүүдэд нэн шаардлагатай тоног төхөөрөмжийг үе шаттайгаар нийлүүлэн ажиллаж байна.
Цар тахлын халдвар буурахгүй байгаа энэ үед Өрхийн эрүүл мэндийн төвийн ачаалал ихэсч, эрүүл мэндийн тусламж үйлчилгээ авах иргэдийн тоо өмнөхөөсөө хэд дахин нэмэгдснээр тоног төхөөрөмжийн хэрэгцээ шаардлага тулгарч байна.
Өнөөдөр Хан-Уул дүүргийн 9,10,12, 14,16, 21 дүгээр хорооны Өрхийн эрүүл мэндийн төв, 13 дугаар хорооны Туул тосгоны эмнэлэгт нэн шаардлагатай байгаа Биохимийн автомат анализатор, Гематологийн анализатор, шүдний бор машин, ургийн монитор, сонсгол шалгагч, зүрхний дефибрилятор, биеийн жингийн индекс тодорхойлогч, холестрин хэмжигч, физик эмчилгээний тоног төхөөрөмжүүд гэх мэт 400 сая төгрөгийн өртөг бүхий 33 нэр төрлийн нийт 153 ширхэг тоног төхөөрөмжийг НИТХ-ын төлөөлөгч, Хан-Уул дүүргийн Засаг дарга Ж.Алдаржавхлан, НИТХ-ын төлөөлөгч Б.Мягмар нар хүлээлгэн өгч, хороодын иргэддээ эрүүл мэндийн анхан шатны тусламж, үйлчилгээг шуурхай хүргэн ажиллахыг хүслээ.
Дүүргийн Засаг дарга цаашид Өрхийн эрүүл мэндийн төвүүдэд шаардлагатай тоног төхөөрөмжийг үе шаттайгаар шийдвэрлэн дэмжин ажиллахаа илэрхийлэв.
Хан-Уул дүүргийн Засаг даргын Тамгын газар
