Оны эхний есөн сарын хугацаанд 10,500 өрхөд 787 тэрбум төгрөгийн ипотекийн зээл олгожээ

Хөнгөлөлттэй хүүтэй ипотекийн зээлийн хөтөлбөрийн хүрээнд 2021 оны эхний есөн сард Монголбанк болон банкны эх үүсвэрээр нийт 787.2 тэрбум төгрөгийн зээлийг 10.5 мянган өрхөд олголоо. Өөрөөр хэлбэл, 2021 онд сард дунджаар 87.9 тэрбум төгрөгийн зээлийг олгосон байна. Монголбанкнаас 2021 оны арав болон арваннэгдүгээр сард тус бүр 40 тэрбум төгрөгийн эх үүсвэрийг арилжааны банкуудад хуваарилж, холбогдох гэрээний дагуу банкууд өөрийн эх үүсвэрээр 26.7 тэрбум төгрөгийг нэмснээр тухайн хоёр сард нийт 133.4 тэрбум төгрөгийн ипотекийн хөтөлбөрийн зээлийг олгохоор байна.

Түүнчлэн, тус хөтөлбөрийн ач холбогдлыг харгалзахын зэрэгцээ холбогдох эрх зүйн баримт бичгийн дагуу Монголбанкнаас тус хөтөлбөрийг 2023 онд багтаан Засгийн газарт бүрэн шилжүүлэх бэлтгэл ажлыг хангаж байна. Энэ хугацаанд хөтөлбөрийн тасралтгүй байдлыг хангаж ажиллах болно хэмээн Монголбанкнаас мэдээллээ.